به گزارش هزارماسوله ، میان آوو(جزیرە) "مائویی" جە هاوایی آمریکاینه گڕش کەوتەنە و تا ایسەتێ 111 نَفرێ گیانشان جە دەس دان و مواچیو کە ڕەقەمو آ کەسانە کە چی گڕەنە بە هۆ آیر و دوکەڵی مەردێنێ،زیادتَرەن و هەڵای دمایین آمارو مەرگ و سۆتەو اَرەنیشتێ ای جزیرەیە نیاوان دەسو هواڵ کیانێ و وڵاو و منتشر نەویەن.
هەرپاسە تا الان هزاران کەسێ یانە و زندگیشان جیا آستەن و ڕوە بیرونو جزیرەی کەوتێنە ڕا وهزاران یانێ و یاگێ کسم و کاری گڕشان گێرتەن و چۆڵێ بیەنێ.
کاربەدەسێ ای جزیرەیە بە هواڵ کیانێ واتەنشان کە آیر،فرەو ای جزیرەیشە گێرتەنەرە و ساعت بە ساعت فرەتەریچ مەد٘ۆ و دَم بە دَم گەشە مەکەرۆ و هەرچی وەرو دەمیشەنە بۆ،مەسوچنۆش و مەپڕوزنۆش و مەکەرۆش بوڵە و گیاندار و بێ گیانش کەردەن قەقنەس.
جە بیانیە و جاڕو آژانسو مدیریتو قەیرانو هاوایی آمەن کە هەر جە سەرەتاو ڕۆ یەرەشەمەی،ای آیرە دسش پەنە کەرد و فرەی جە یانەوبەر و ساختمان و چێرساختێ،سۆتێنێ و ضرر و زیان فرە دریان اَو اَرەنیشتێ و ساکنانو ای جزیرەیە و هەرپاسە 35000 نفرێ کەوتێنی خطر و مەتەرسی و حەیوەتیەو گیانیشان و پارێزنای وێ و یانەوەی(خانوادە)ناچارێ بیەنی ای جزیرەیە جیابازانێ و ڕوەو یاگانێ تەری بەرشان.
دمایین وینێ و فیلمێ چی جزیرەیە جە میدیا و هواڵێ تلویزیونی،قیامَتێ جە گڕ و آیر و بروسکەی نیشانە مەد٘و کە شارو "لاهاینا"-ش جە کەراخو پاناوێ (اقیانوس)پەنگنان و آژە و وضعێ ناجۆر و نابار و اضطراریش آوردەن وەرو و گڕەکە اننە اَسەنشۆ کە هەورێ جە دوکەڵێ سیاوی آسمان و ڕاسەرو ای شاریشە گێرتەنەرە و فرەو خەڵکی تۆقاینێ و حەیوەتیەو گیانیشانەنە، پَناشان بەردێنە کراخو دَریای و وێشان مەوزان دلێ آوەو اُقیانوسی.
فَرمانداری هاوایی ماچۆ:80 جە سەد٘و شارو "لاهاینای" بیەن بوڵە و هیچش نەمەنەن،اَجیۆ بمێ(بمب) دان وەنە